Namminersornerullutik Oqartussat kommuunillu inissiaataanni attartortittakkani ineqarnermut akiliutip naatsorsorneqartarnissaa pillugu nalunaarut nr. 32, 17. august 2001-imeersoq.

 

Inissianik attartorneq pillugu Inatsisartut peqqussutaanni nr. 3-mi, 13. juni 1994-imeersumi § 10, imm. 4, naapertorlugu aalajangersarneqarput:

 

Nalinginnaasumik

§ 1. Attartortitsisutut paasineqassaaq A/S Inissiaatileqatigiiffik INI, inissianik attartortittakkanik piginnittoq, tassa Namminersornerullutik Oqartussat imaluunniit kommuuni inissiat ingerlanneqarnissaat aqunneqarnissaallu pillugit inissiaatileqatigiiffimmut isumaqatigiissuteqarsimappat.

 

Maleruagassat atuuffigisassaat

§ 2. Nalunaarut manna atuutissaaq Namminersornerullutik Oqartussat aamma Kalaallit Nunaanni kommuunit inissiaataannut, matuma ataani ilaqutariinnut arlalinnut inissiani ininut arlalinnik initalinnut, ineeqqanut inissianilu ineerakkaarlugit arlaliuttarissanut kiisalu illunut ataasiakkaanut marloqiusanullu.
Imm. 2. Ilaqutariinnut arlalinnut inissiatut naatsorsuunneqassapput inissiat quleriiaat, inissiat uigulukuttut illullu ataqatigiiaat minnerpaamik pingasunik inissiartaqartut, tassaasinnaasut illut pingasunngorlugit nipititerlugit sanaajusut.
Imm. 3. Ineeqqatut paasineqassaaq inissiaq ataasiinnarmik initalik immikkut igaffeqanngitsoq, kisannili igaffeeralik, uffarfilik perusuersartarfilillu, ineerakkaarlutillu arlaliuttarissatut paasineqassapput inissiani ineeqqat ataasiakkaat inissiami soorlu igaffimmut, uffarfimmut perusuersartarfimmullu atuinissamut periarfissallit.

 

Ineqarnermut akiliutip naatsorsorneqartarnissaa

§ 3. § 5 naapertorlugu inissiap ingerlanneqarneranut atatillugu pisariaqartumik aningaasartuutit kiisalu § 6 naapertorlugu aningaasaliissutaasimasunit iluanaarutit sinnerlugit ineqarnermut akiliut angissuseqassanngilaq.
Imm. 2. Ineqarnermut akiliut qaammatinik pingasunik sioqqutsisumik allakkatigut nalunaaruteqarnikkut qaffanneqarsinnaavoq.
Imm. 3. Inissiap angissusiata naatsorsorneqartarnissaa pillugu Namminersornerullutik Oqartussat nalunaarutaat naapertorlugu inissiat ataasiakkaat angissusii tunngavigalugit ineqarnermut akiliut tassungalu qaffaat avinneqassapput.
Imm. 4. Inissiani ineerakkaarlugit arlaliuttarissani ineeqqap inigineqarsinnaasortaata angissusia tassaavoq ineeqqap angissusia taamatullu inissiami ataatsimoorussiffinni atukkap angissusia. Ineeqqat ataasiakkaat ataatsimoorussiffinni atueqataanerat annertussusilerniarneqassaaq ineeqqat ataasiakkaat angissusiat naleqqiussilluni tunngaviliuttarlugu.

§ 4. Inissiani attartortittakkani ilaqutariinnut arlalinnut illorsuit Ineqarfinnut Immikkoortortaqarfinngortiterneqassapput, tak. Inissianik attartorneq pillugu Inatsisartut peqqussutaanni § 7. Immikkoortortaqarfinni ataasiakkaani attartornermut akiliut naatsorneqartassaaq missingersuutit qaammatisiutit malillugit ukiumut ataatsimut atuuttut tunngavigalugit, taamaalilluni immikkoortortaqarfik immikkoortortaqarfittut aningaasartuutiminik isertitani atorlugit akiliisinnaasunngorlugu.
Imm. 2. Ukiumoortumik missingersuutit suliarineqarnerannut atatillugu immikkoortortami siulersuisut attartortitsisullu sinniisaata nalinginnaasumik aserfallatsaaliuinerup pitsaassusia misissuataassavaat ukiumilu missingersuusiorfiusumi suut suliarineqassanersut oqaluuseralugu.
Imm. 3. Imm. 2-mi misissuataarineq eqqartorneqartoq tunngavigalugu attartortitsisoq missingersuutinut siunnersuusiussaaq, attartortitsisumit akuerineqavitsinnani immikkoortoqarfimmi siulersuisunit akuerineqartussamik.
Imm. 4. Illunut ataasiakkaanut aamma illunut marloqiusanut ineqarnermut akiliutissat kommuunimi illunut ataasiakkaanut illunullu marloqiusanut tamanut atuuttussat qaammatisiutit malillugit ukiumut missingersuutit tunngavigalugit aalajangersarneqartassapput.

 

Ingerlatsinermut aningaasartuutit

§ 5. Ingerlatsinermut aningaasartuutit pisariaqartut tassaapput ingerlatsinermut aningaasartuutit tamarmiusut, matuma ataani ilaqutariinnut arlalinnut illorsuarni sulisut akissarsiaat, avataanit sullinneqarnerit, pisiniarnerit, ingerlatsinermut atortut, iluarsaassineq aserfallatsaaliuinerlu, aningaasartuutit assigiinngitsut, allaffissornermut aningaasartuutit il.il. kiisalu iluarsaatilersaakkanut toqqortat.
Imm. 2. Imm. 1-imi ingerlatsinermut aningaasartuutit taaneqartut saniatigut ilaqutariinnut ataatsinut illuni aamma illuni marloqiusani aammattaaq ingerlatsinermut aningaasartuutinut ilaapput anartarfilerineq, septiktankip imaarneqartarnera, paaviaaneq, erngup aqqutaanik innaallagissamik kiassaaneq kiisalu illu immertakkamik imiisiveqarpat imermik pajunneqartarnermut aningaasartuutit.
Imm. 3. Sumiiffinni sermimik aatsitsinikkut imermik pilersuisoqaraangat nammineerluniluunniit imertartarfeqarpat imaluunniit anartarfinnik imaarsisoqartanngippat, tamatumunnga aningaasartuutit pillugit attartortitsisoq attartortorlu immikkut isumaqatigiissuteqassapput.

 

Aningaasaliissutaasimasunit iluanaarutit

§ 6. Aningaasaliissutaasimasunit illumik piginnittumut ukiumut iluanaarutissat illuutip sananeqarnerani aningaasartuutit 1,5 pct.-erissavaat, tak. § 7.

§ 7. Sananermut aningaasartuutinut ilanngunneqassapput inissiap sananeqarneranut aningaasartuutit tamarmik, matuma ataani pilersaarusiornermut, nakkutilliinermut sanaartorfiullu iluani nunagissaanermut aningaasartuutit. Sanaartornermut aki minnerpaamik kvadratmeterimut 7.000 kr.-iussaaq.
Imm. 2. Illuummi nutarsakkami sanaartornermut aki nutarsaaneq naammassereerpat iluarsineqassaaq, nutarsaanerup aallartinneqarnerani sanaartornermut aningaasartuutit annertussuserisimasaagaluat nutarsaanermi aningaasartuutaasut ilaannik illumik pitsanngoriaateqartitsisunik ilassusiivigalugit, tak. imm. 1.
Imm. 3. Illuutini pisiarineqartuni pisiarineranut akia kingusinnerusukkut immaqa allanngortiterneranik imaluunniit pitsanngoriaataannik ilallugu sananeratut akiatut naatsorsuunneqassaaq, takuulli imm. 1.
Imm. 4. Kingornussarsiaasimasoq malillugu akeqanngitsumik illuutit pineqartut, tunissutitut pissarsiarineqartut, illuutip pinngitsaaliissummik peerneqarnerata imaluunniit akiligassanik tigusiniarnermut imaluunniit taartigiinnerup malitsigisaanik aammattaaq imm. 1 taamatorluinnaq atuutissaaq.

 

Attartornermut akiliutip naatsorsorneqarnissaani ilanngaatissat

§ 8. Illuutip sananeqarneranut aningaasartuutit kvadratmiiterimut ataatsimut 7.000 kr.-niunissaat aalajangiunneqarsimappat, tak. § 7, illuutilli ikkussuutassat imm. 2-mi taaneqarsimasut ilaat ataaseq arlallilluunniit amigaatigippagit illuutip sananeqarneranut aningaasartuutit, tak. § 7, apparsaavigineqassapput ikkussugassakkaartut amigaataaneri tamaasa kvadratmiiterimut ataatsimut 1.000 kr.-ninik.
Imm. 2. Ikkussugassat makkua amigaataagaangata sananermut aningaasartuutit apparsaavigineqartassapput:
1) Uffarfik/perusuersartarfik kuutsittagaq.
2) Kiassaateqarfik/kiassaat uuliatortoq/innaallagissamik kiassaat.
3) Innaallagiaq.
4) Imeq kuuinnartoq imaluunniit imiisivik.
5) Gas imaluunniit innaallagiaq iganermut atugassaq.
6) Oqorsaatit, tak. imm. 3.
Imm. 3. Naqqit, qilaat iikkallu katillugit oqorsarneqarsimaneqarnerat kiffiutissanik mineraluldinik 250 mm-usunik oqorsaasarnermit annikinneruppat sananermut aningaasartuutit annikillisaavigineqassapput, tak. imm. 2, nr. 6. Oqorsaatissat allat atorlugit oqorsaasoqarsimappat oqorsaasinnaassusiat mineraluldit oqorsaasinnaanerinut naleqqersuunneqassaaq.

 

Atuutilerfissaa ikaarsaariarnissarlu pillugu aalajangersakkat

§ 9. Ineqarnermut akiliut apparsaaviginiarlugu meeqqanut 18-nit ataallugit ukiulinnut ineqarnermut meeqqanut tapiissuteqartoqartassaaq. Tapiissut tunniunneqartassaaq 31. december 2001 tikillugu, aammalu taamaallaat meeraq ineqarnermut akiliutip akilerneqarfissaani najugaqarfimmi tassani inuit nalunaarsorsimaffianni nalunaarsimasimappat.
Imm. 2. Ineqarnermut meeqqanut tapiissut meeqqamut ataatsimut ineqarnermut akiliutissatut naatsorsorneqarsimasup 10%-terissavaa, taamaallaalli 60% annerpaaffigissallugu.

§ 10. Nalunaarut atulissaaq ulloq 1. september 2001.
Imm. 2. Peqatigitillugu atorunnaarsinneqassaaq Namminersornerullutik Oqartussat Kommuunillu attartortittagaanni ineqarnermut akiliutissat naatsorsorneqartarnissaat pillugu Namminersornerullutik Oqartussat Nalunaarutaat nr. 56, 29. december 1994-imeersoq.

Namminersornerullutik Oqartussat, ulloq 17. august 2001.

Steffen Ulrich-Lynge

/

Jens K. Lyberth